Definire sa paghe
est su tema profundu
de sa bilantza armonica mentale
tra corpus ch’est s’ambaghe
pro godire s’arrundu
de s’ispìritu ch’est prenda e giuale
e missu de fiducia
chi che frundit sa bucia
pro gustare su frutu naturale
sighende su sentore
ch’est ghia e brama de su beru amore.

De se fortzat s’ischire
cun reale sentidu
làcanas giaras bisonzos mazores
pro biver e coglire
in custu umanu nidu
acontzos a faddinas de umores
pro ch’iscartare lua
chi sirigant a cua
disumanos eventos de rigores
imbarzende s’isfida
ch’est sempre braja tra calda e buddida.

Atinare est manera
de pessos pasa pasa
chi mudant cun sa calma sos anneos
che achicare chera
a s’istopa romasa
pro ispargher lugore in sos istreos
dende calma cun tonu
indulchidu a perdonu
pro isolver de s’ira sos peleos
minimende velenu
in trista brama pro possessu anzenu

che cussa a dolumannu
dae maridu a muzere
si vile fieresa cuntierrat
cale peus malannu
lanzu de miserere
su coro amadu pro possessu isperrat
forsis ca su mercadu
pretenet altu gradu
e in bullos de chimera che l’inserrat
pro non perder nomea
sofia de istrumpeddos e cadrea.

Sa paghe no est ebbia
un’ispera distante
ma duas alas fortes e siguras
e insinzu a pitzinnia
pro cunfrontu importante
cun sas divessas fides e culturas
e fagher atzetare
chena las denigrare
sas sessuales orientaduras
ca totu ant su diritu
biver su chi natura l’at iscritu.