Duru duru pitzinnos,
provamos a ballare,
cun armonia, a chelu dimandada,
su ballu 'e sos carignos,
ch'amore cheret dare,
e fagher paris una serenada,
dedicada a su mundu,
ballande a ballu tundu,
in donzi terra, in donzi contonada.
Chena razza e colore,
bellos, unidos paris in s'amore.

E cuntentos prenamos,
de petalos sa via,
brincamos in su ballu 'e sos minores;
cun su pinzellu damos,
po tingher s'allegria,
sentidos chi che catzen sos dolores,
de pitzinnos famidos,
o cun sa seda 'estidos,
chi dae tottus retzin sos onores.
Inserrados in corte,
chena giogare, ca cussa est sa sorte.

Solu serenidade,
est su chi dimandamos,
non nos ponzedas, mannos, in turmentu;
in bratzos nos leade,
un azudu chircamos,
ca de gosare custu est su momentu.
Non cherimos coronas,
ne meres in sas tronas,
bogadeche de gherra s'armamentu.
In donzi terra, in mare,
ballos de paghe si potan pesare

Lassadenos in pasu,
e faghidenos crescher
chena dolores, chena pensamentos;
finas cun d'unu 'asu,
at a poder abrescher,
unu mundu ube tottus sun cuntentos.

Seconda classificata Premio di poesia "Tiu Finu" - Romana 2013
In memoria di Gian Gavino Piredda