Bastat una mirada
de Antonio Sannia

Bastat una mirada
ch'essit dae su coro
po ti narrer chi t'amo.
Columba mia amada
ses su meu tesoro
ischis cantu ti bramo.

Cando amore ti giamo
prenda de oro cara,
chi mi cheres mi nara
de oro cara prenda,
d' amore ses sienda
de sos ogros incantu.

Columba mia amada
ses su meu tesoro
ti bramo, l'ischis cantu.

De sa domo ses bantu
e de sos fizos ghia,
amada isposa mia
ghia ses de sos fizos,
raros, bellos che lizos
pesados cun decoro.

Columba mia amada
ischis cantu ti bramo
ses su meu tesoro.

Ca ses sa lughe insoro
ses mama e ses isposa,
e de modos donosa
ses isposa e ses mama,
e ses digna de brama
in s'amore recreu.

Columba mia amada
ischis cantu ti bramo
ses su tesoro meu.

Amore chena anneu
brillante de lugore,
chena anneu amore
de lugore brillante,
mi das in d'onzi istante
cando amore ti giamo.

Bastat una mirada
ch'essit dae su coro
po ti narrer chi t'amo.

Ischis cantu ti bramo
ses su meu tesoro
columba mia amada.
Po ti narrer chi t'amo
ch'essit dae su coro
bastat una mirada.

Segnalazione al XXIV Concorso di Poesia Sarda C.R.E.I.-A.C.L.I. -Silius 2012