Bellesa subra a totu de sas bellas
chi che a tie non bind'at mancuna
ca ses 'e agualare a sas istellas
simizante a su sole e a sa luna.
Tue ses che a issas e non mellas
chircan e non nd'agatan ateruna
Est abberu fortuna a nd'agatare
mancari chi nde cherfana chircare.

Istas che rosa in su fundu fozida
ca a sa cara ses una rosa vera
fines parias dae Chelu 'essida
pro mudare sa terra ei s'aera
tue sì chi ses prella rellughida
chi tenes sa bellesa verdadera,
chin sa mirada tua alta diosa
nd'ammachias a totus grassiosa.

Totu su mundu nd'est ammachiadu
de sa bellesa tua nd'an ispantu
Deus chin donzi donu ti at dotadu
e tenes in favore donzi santu,
pro esser sola Deus ti at criadu
pro dare meraviglia ateretantu,
chi refrantu ti fagan sos Anghèlos
e tinde alzene a sos altos chelos.

E potas olobrare sa glorìa
a pustis morte chin vida largàna
ca pares una magine in s'Indìa
non pares esser chi sias umana,
tue est chi das a totus s'allegria
dotada de 'ogni grassia soberana.
Diana delicada incantadora
chi mannos e minores sind'ammoran.

Sind'ammorana mannos e minores
jeo puru ti bramo chin disizos
ja mi causas penas e dolores
e mi faghes istare in contivizos.
Tue ses prenda de altos valores
ch'atera non bind'at de assimizos,
chizos de alabastru risplendentes
cudda chi mudat totu sos parentes.

Cudda chi mudat totu cussu 'ereu
ca non bind'at naschidu che a tie.
Non t'agatan irghenzu e nè ofeu,
su fronte bellu che sambene e nie,
sa prus lughente ch'at formadu Deu
cudda ch'at postu in regiros a mie,
che de die su note dat lugura
pro mirare sa tua biancura.

Che de die su note dat lugore
ca pares essere una meraviza,
ti at formadu Cristos Redentore
a sa lughe de chelu ti assimizas
e pro cussu ti tenen totu amore
chi donzi cristianu ti disizat.
Gallizas tue sola in custu mundu
chi s'abban sas ateras in fundu.

Totus las jughes suta de sos pes,
Pro cussu tinde tenen imbidìa,
su retratu nde faghene sos res
como chi nd'an intesu s'istorìa,
chi mancu tue e totu ti lu cres
c'as sa bellesa fine e simpatia,
in perfidias as postu sas giungellas,
marchesas, contissas e donzellas.

Marchesas, damigellas, graduadas,
benini pro ti faghere cumpanzia,
aposta si las an abbaidadas
mancuna 'e agualare bind'aiat,
a tie sola sono 'istadas dadas
cuddas donassiones de grassìa
ca tenes donos in particulare
sos menzus chi si poten agatare.

Totu sos donos as a cumprimentu:
sa bellesa, s'adornu, su mirare,
sabia, bona e de connoschimentu,
ateretantu su modu 'e tratare.
Donzi bona fortuna de talentu
apas in sa Gloria a meritare,
a t'acumpanzare 'enzan sos Anghèlos
pro t'onoraren in sos altos Chelos.

Chin sole, luna, astros e istellas
totu a corona in Celeste Coluna,
bellesa subra totu de sas bellas
chi che a tie non bind'at mancuna