Unu benemèritu a su Poeta dottor
Angelo Pinna

Ben’ennidu
di Giuseppe Concas

S’i de sa zanna indendo su sonu
mai naro chi-e ses chi-e
m’Agheleddos comente a Tie
sempre b’indenzada e a bonu,

da-e prima de oe appo iscopertu
sa pasta chi es de bona calidade
pro me es guardia e ‘sonestade
su zannile lu lasso sempre abertu,

su narres Tuo su coro m’ad’abertu
mi da de caminare volontade
ca puru abìtu mannu a tarda edade
es che putzone solu in su desertu.

Tue za l’ischis chi sa cumpanzia
mi ha fattu sempre piaghere
mi cresche sa forza su podere
e-i s’artu morale s’armonia.

Intendo su triballu unu dovere
ca es valore pro s’economia,
ma sa naturale poesia
penso chi de sos campos e’ sa mere.

E deo intro ‘e sa conca mia
es minore minore ma l’intendo
manca sa cultura e lu cumprendo
giogo solu cun sa fantasia,

ca lisco chi m’iscurtas de abberu
su chi sento in su coro ti lu naro
pius t’intendo e pius imparo
su Tuo bellu argumentu veru,

mi da’ s’ispinta e a pianu a pianu
sigo pro sos chent’anno su caminu
e a Tie ti accumpanzet su destinu
de bi arrivare allegru e sanu.

Da poi chi lompo sos chent’annos
chi de partire minde dà s’avvisu
si m’aberit sa zanna in Paradisu
non mi ponza cun sos poetas mannos.