Incumanno sos bentos
chin sos cumannamentos
ch’at iscrittu in sas pretas Muisè.
Beneico sas pretas
sas pretas de Onanie,
sas pretas ch’at secatu babbu meu;
chin sudore e anneu
las at secatas pro pesare a mie.

Finas si so dormitu
paret chi vida iscrittu
in donzi preta su lùmene suo,
e in su coro su dèpitu meu.

Las beneico a boche
sas pretas de inoche
ei sas de atterue:
sas pretas luvulesas,
finas sas de Gongale
ei sas vitichesas
uve a Diegu an datu su natale.

Beneico sas pretas,
sas pretas de Lodè;
ma pro su vicerè
vènnitu dae mare
(su santu chi l’at fattu)
lassàtemi pessare:

at delegatu a mussegnore Bua
pro serrare sas tancas,
(a donzunu sa sua).
Funtanas e caminos
an serratu a giardinos
chin pretas a farrancas
e chin su marrapiccu
uve bidian terra
fachian sa gherra,
ma vinchitore fit semper su riccu.

Custu a rettore Mele
intro su coro li poniat fele:
su ch’aer iscontzatu su connotu.

Beneico sas pretas,
las beneico tottus
e non m’istracco mai.

Pro cantu duro viu,
finas si son metas
sas pretas de su riu:
beneico sas pretas de Oltzai.

Iscusate s’irbaglio,
si canno vido muru
e so veneichenne
chin su coro travaglio.
A sas pretas pensenne
las veneico postas gai puru.

Beneico sas pretas e concruo:
si tanco s’oju mi paglio videnne,
in d’unu muru accurtzu a sa ’untana,
unu rettore vestitu a suttana
chene camisa e allegru cantenne:
«In Oltzai viuda nen bajana».
Beneico sas pretas.