Leami in coa tua
che giovaneddu ancora,
o bell'ammajadora Dea mia!
Non m'istes cua cua.
ca morzo prim"e s'ora
si mi mancat sa tua cumpagnia.
Giughemi a manu tenta
e ista bene attenta
chi rutta in malos logos non che dia
ca cherzo istare sanu
e sempre affacca a tie fittianu.

Ma tue non nd'has dolu
como de m"ider bezzu,
e in ojos che prima non mi miras.
Mi lassas sempre solu
senza b'essere avvezzu
e piseddos amantes ti ch'attiras.
Eppuru giuto in venas
currentes in pienas
de samben chi tue mi che tiras...
No m'imbezzat su coro
e de te da-e nou m'innamoro.

Beni!, no m'abbandones,
dami calchi mirada,
o bella, non mi neghes unu 'asu.
Si in andia mi pones
sa mente anneulada
fatto sos bolos finas a s'occasu.
Signora Poesia,
dama 'e cumpagnia,
giughemi nessi a pés de su Parnasu,
inue a sos vint'annos
basadu m'has a primu a suzzos mannos.