Benissiones e Olianzas

Ah cussas manos galanas e nettas
fattu ana su trivagliu dechente
no solu chi sa balla serente
ma imbicchida fertu a sas petas

Oh fizzu meu sas manos tuas nettas
ti las lavo chi custa abba santa
S’obrigassione che ando canta canta
Sinnadi e innetadi sa petas

Si rutu ch’es che puzzone dae nidu
es pezi ca no ischiat olare
Cando poi l’an depidu oliare
sa presenzia li as fatu ingrispidu

Ite b’ada prus de toccare losa
A cussu fidi dae meda cumpostu
Mescradu sambene! Da fidi postu!
No che su tou de erenzia ermosa!

Benes tancados a muros chin berritas
ndamus chentu de fiados domados
Ite cussos noeddos acamados
cheren dae sas tuas manos beneitas?

Gianne Chessa (01/04/2005)
Torpè

==================

Nota - Erenzias istruncana in camineras, in chentu andaines che roccos de pilisos, isparghene lentore in sa pampana de sa ide e filunzanas siccan note chin die.
Babai es mortu! Sos aposentos de sa dommo reventini sidaglios! Este mortu e commo ligana su pane intro e sos ammaglios.
Babai es mortu e chentu arraiulidos cattedos cheren partire tancas e isteglios!
Babai es mortu ! E chie commo ada a pesare muros a urdu?
Sambene chin sambene, terra ammisturada.
Gupiules pessamentos!
Mancu cota e tela an cherfidu lassare.

Giuanne Chessa