Rivos de latte chi siccan su coro
imbolados a terra pro protesta
contra chie cumanna sa richiesta
de unu bene pretziosu cantu s’oro.

Fruttu de traballu e de sudore
Dae sos tempos anticos est istadu,
Su capitale azes sempere postadu
Ca est sa richessa ‘e su pastore.

Ajò! Bennida est s’ora ‘e s’ischidare!
De lottare contra custa zente
Chi est istada chin bois insolente
E su bene lu chircat oltremare.

Pastores! Gherramus tottu unidos!
Ca custa est una lotta sacrosanta
Sezis sas raichinas de una pianta
Chi est forte puru chene sos parthidos.

Sas vertentzias achidelas sas vostras
E non bos achedas incantare
Dae unu rialtzu chi bos cheren dare
Ca sas perdidas son sempere sas vostras.

Tenzan in mente sos industriales
Chi non son issos chi murghen sas erbeches
Ponen sos prejos ma tenen sas neches
E a bois ne benin solu males.

Ajò! Bennida est s’ora de s’ischidare
De s’unire contra custa zente
Chi hat semper chircadu s’espediente
Pro si achere s’interessu e bos isfruttare.