As chèfidu contivizare
veridades aparentes,
totu su chi ammajat
e chi ti dat iscialu.

T’as postu ispijitos iscuros
pro pasare sa vista
dae ingiustiscias sotziales
a non ti fagher iscontriare
dae matanosas règulas morales.

Non ti meravizes como
si t’agatas a sa sola
a s’iscuru
aissegus de traessas russas
de pregiudisciu
da ue sebestas sa lughe.
Ma si proas a t’acerare
as a bìdere
sos biatzos colores ispantosos
de sa divescidade,
as a intèndere
su gosu apagadore
de sa solidariedade,
sa libertade diciosa
de essere beru.

Bessi
a respirare como
a prumones pienos
s’aera nuscosa de s’ispera
e de s’amore.