Bidda mia
di Maria Luisa Pisanu

Bidda mia no as appretziadu
su monte tuo, s'adde, sa piana,
s'aera frisca, s'abba 'e funtana
chi t'at in donzi tempus consoladu.

De nibberos, 'olostros e lidone
solu in pagos connoschene su buscu
ue ruzu, ispinosu creschet fruscu'
in mesu a tuppas, ruo e titione.

Inie s'abba ‘e rios cristallina
curret, lestra che leppere, a su campu,
trazande crastu e rampos, in s'Istrampu
si ch'ettat, che astore, a s'anzadina.

Unu nuraghe bies dae attesu,
nieddu, solitariu e derruttu,
de insinzos, in logu, mancu muttu,
ne camineras fattas b'ada in mesu.

S'aera chi t'arrivat a su nare
at nuscu de munteddos e armidda,
consolat sos istranzos chi sa 'idda
benin gai, a sa tzega, a bisitare.

Che femina discreta e riservada
Bolotana si mustrat pianu, pianu,
falande dae montes a su pranu,
bella, in rizzos palinzos assentada.

Prima distinghes sa rughe de Patada,
posca domos, piazza, campanile
e bezzas friscurande in su zannile,
de carrelas istrintas, in falada.
Si sun abertas, (depes zugher canna!)

chimbe cresias podes visitare,
in Santu Bachis su menzus altare
e unu Cristos in cresia manna.
Si nde chircas, agatas pane 'e fresa
o petta frisca, casu, ozu 'ermanu,
tappettos sardos tessidos a manu
e sartizza de ponner in sa mesa.

Costoidos, che benes de famillia,
accraeddados in cassia forte,
dae mama natura e bona sorte,
asa rezzidu prendas e rechillia.

Bidda cara, sos benes eredados
bennida es s'ora 'e nde ogar'a campu,
o ti mezoras o no b'at iscampu:
morimus a sa sola, isconsolados.

Bolotana, su 24 'e triulas 2011.