Dedicata a Dorgali

Allegami a s’iscusiu lena lena
inoche in santu Bacchis in s’arzola
terra d’ispicas chi biazas e sola
reina‘e sa Sardigna ses armena.

Terra de mare de frumenes montes…
terra‘e olivares de binzas ricchesa
terra‘e pasturas de casos po mesa
terra‘e sennores de villas de contes.

In sas arturas sas muvras’a mantu
melan a forte a filu‘e orizonte
b’est frumeneddu chi falat’a ponte
Tiscali anticu ch’isticchit s’incantu.

B’est Caderina s’antica mattrona
frorit sa fide in mesu s’artare
Santu zoseppe chi nos cheret dare
cussizos bonos po cad’arte bona.

B’est cara a mare Ilune dorada
po su turista unu locu d’incantu
terra‘e poesias chi frorin a mantu
terra‘e tenores a boche‘e pesada.

Terra‘e nuraghes bene custodidos
terra de janas de musas fadadas
terra‘e orulettas zambellas seàdas
terra‘e turismu de riccos servidos.

Terra d’uresis pintados chin s’oro
zoigas pintadas in sinos d’ispantu
ballu a tres passos a nottas d’incantu
ses una terra chi mudat su coro.