Biografia
de Mimmia Soro

Caru Luisi rispondo a s’appellu
Ca m’has giamadu, ecomi presente,
Che iscolaru, a mastru, ubidiente,
Ti che imbio sa biografia
Però dach’ides sa fotografia
No t’asciucones, ca so pagu bellu.

Rifletibi subra unu momentu
E no mi giames poeta, ca mi offendo.
Titulu chi no m’ispetada no pretendo,
E nemmancu de laru sa corona,
Ca cussa est pro sos fizzos d’Elicona
Chi fiorente hana unu talentu.

Iscrio calchi rima deo puru
Umile, tra sos umiles connotu,
E si che deo istados fini tottu
Sos Poetas chi cantana in sas garas
Modas, duinas e ottadas raras
Nond’haian cantadu de seguru.

Che umile terrenu peccadore
S’illusione macca giuto a palas
Amante de poetes’e, de galas
Mi sonnio cun issos in s’altura
Est solu sonniu,ca mama natura
Negadu mi hada cussu onore.

Da custu fizzu de su Logudoro
Rezi tantos saludos dae Soro.

(Olanda)