Bisende lughes in tempos reghentes
m’imbato in umbras de niedda forra
mentras grisadu paro sa petorra
a cadenas de fados insolentes.

In s’immina ’e notiscias frecuentes
paret ch’intenda ebbia sonu ’e corra
de cotzeris de mafia e camorra,
chin droga, morte e delincuentes.

E in prus tzertos ch’an sidi ’e podere
sun chin zirabanderas a misturu,
in campos chena lacana ne mere.

In tempos goi nemos est siguru;
e mi pregunto a chie poto crêre
si mentras biso lughes ’ido iscuru.