Bisos de pratta
de Tonino Fancello

Non cheret...
mimulas...anzenas...
su entu majarzu custa notte...
in s’incudine‘e su tempus
est mazande
sas ideas andalusas
de s’omine pertuntu loricau.

S’alinu‘e s’antigu berritta
s’est falau in chisina
lassande sa trampa‘e su pruere
a si cundire in bratzos de su disisperu.

Bandulera...s’allega‘e sa notte
biazat disizande valores
murrunzat passos de falsidade
colat che boja...in s’arcu‘e sa estrale‘e su sole
lassande farruttas d’ammentos
a si posaren intro s’armarzu
de sos crapicos de sos accordos d’ierru.

Istranzos sos cussizos
pranghen in s’orulu‘e sa lughe
iscurtan sentidos iscussertos
“ue sas gaffas cuadas drinnin che campanas
tambande in sas lunadigas oras
chi s’omine mariolat in su computer
e truvat che rellozu issurdiu andalusu…
in sas fritzas lestras de su tempus.

Basta!...inue son finidos?
sos sapores de sas paristorias betzas.
e s’ardore ‘e sa terra pruminta.

Nessi un’iscutta…in beranu
mi cherzo torrare a imbrossinare
a bide’s’ispiga inzallinde
e in triulas cherzo leare torra fracu‘e tricu su manzanu.

Cherzo torrar’a intende sas lavadoras
cantande a mutos in sos rios,
e in s’armarzu‘e su tempus cherzo servare sos ammentos
po chircare in sa notte sa chimera
cando frorit intro sos bisos...versos libertade...e de poesia.

Secondo Premio (Prantaferru2012)