Boghes

Boghes de iscussertos
isfidande sa sorte
in carretas de morte
traitoras.

Boghes atitadoras
de Cristos e Barabbas
current subra sas abbas
airadas.

Boghes disisperadas
de su dolu cumpanzas
in sas terras istranzas
irachenas.

Dèbiles cantilenas
intonande lamentos
chi sos fùsidos bentos
moltiplìcant.

Sas companas repicant
sa canton’e su mortu:
boghes de iscunfortu,
de tristuras.

Mannos e criaturas
che odiosos Cainos
in sos sacros caminos
de su Cristos.

Boghes e ogios tristos
implorande piedades.
boghes, boghes de frades
male fertos.

Boghes…in sos desertos!

Antonio Piras (Scano)