Bola!
a Gianni Tolu

Como ch’as postu pumas pro ’olare
atenziona e, totu cunsidèra:
mira ogni nue chi b’est in s’aera
ogni giàssu1 inue deves colare,
e sighi, cun fortuna a atraessare
de sa terra ogni istrada e caminera.

Puit’est in s’andare chi sa vida
porrit cantu de mezus podet dare,
cando cun bantu, benit a mustrare
virtude chi teniat costoida
e chi como cumparit, afortida
e bia, pronta a vivere e tucare.

Est como chi si poden seberare
sos ammentos ch’an postu raighinas,
sos chi mezus dimustran sas dutrinas
ch’as chèlfidu e ch’as potidu imparare,
cussas ch’a una a una e totu umpare
ancora aprendes, mudas e afìnas.

Ca totu semus mastros e ’ischentes2
subra su chilciu3 chi sighit girende,
e nos medit su tempus, calculende
su ch’est dadu o retzidu e, riverentes
como si mustran giaras e potentes
cussas dotes ch’a pizu nd’est boghende.

Ma, a ue est currinde cust’ischire,
ue moven bideas e intentos ?
A inue los giughes sos ammentos,
chirriàdos4 pensend’ ’e indulchire
pensamentos, proende a pessighire
maliconias chi cheren mare e bentos?

Mi naras ch’est sa vida e ch’est dovere
e ammito e cunfirmo sa rejone,
mancari isca ch’est gustu e passione,
chi custa Terra, puru s’at podere,
non podet cuntentare a piaghere
cantos isetan sa bon’istajone.

Penso chi iscas e ch’epas puru intesu
cantu punghen e dolen sas memorias,
e cantu sian beras sas timorias
chi nos giughimos fatu andende atesu,
ca semus Sardos e, bene amos apresu
preju e valore de antigas glorias.

Ma tue ’ola, bola in altu e lea,
e a cantos bi nd’at in cussu logu
mustralis ch’est un’ateru su giogu;
chi cumprendan ch’est atera s’idea,
ca sun finidas buglias e belèa5
sas chi daìan risu e disaogu6.

Ma ista atentu, non fuat dae manu
su cannau7 chi cheret bene astrintu,
ue a s’ateru cabu ogni custrintu8
cumpagnu e amigu ch’est lontanu
mai chilchet o t’iseted invanu
ma, tzeltu ’e t’agatare tiret cunvintu.

Franco Piga (Romana ‘SS’)
su 21 ’e abrile 2007

Bidu chi in sas “dutrinas” imparadas non b’est
su logudoresu …

1 giàssu = punto, luogo, posto
2 dischènte = apprendista
3 chìlciu = cerchio
4 chirriàdu = messo da parte
5 essere a belèa = essere lo zimbello
6 disaògu = divertimento
7 cannàu = corda, fune
8 custrìntu = parente, (anche costrintu)