Oje su chelu iscanzat sa pupia
pro t’imbiare ‘e sole unu carinnu
chi potas ingranire cust’impinnu
che licorosu frutu ‘e prima bia.

Unu frore ‘e Cultura su disinnu
chi ses tessende, est sa sapidoria
de sos jajos anticos, sa nadia
de unu tempus ùmile prus dinnu.

Bola, Nùgoro, bola in libertade
in sas àgheras netas de s’ischire
chin sas alas de s’Arte a pumas d’oro

e sas isperas ch’allatas in coro
siant benas de luche a t’iscrarire
sos passos, cras, de s’immortalidade.

frevarju 2018