Bolat che frina… (Sa paragula)
di Giovanni Piga

Che prenda 'e sole, tinnit che campana
rucrande a bolu s'àghidu 'e sos bentos,
pro dare alenu a cuddos pessamentos
ch'in su cherbeddu s'ischire no ana.

Bolat che frina in alas de intentos
chin s'anima iscanzada, risulana,
de sa nadìa ìnnida funtana,
porrinde bida a limbas chen' apentos.

In sas intrannas, che ispica d'oro
ingranit intellettu; e sapiesa
porrit a s'oje e luche a su benente.

Contipizàla in benas de su coro:
ca est de s'esistèntzia sa ricchesa
e su sale 'e sos pessos in sa mente...