A s’amigu Zusepe Concas de Bolotana
cun sos augurios de…
BONA PASCA ‘E ABRILE 2015

Istimadu Zusepe, duas rigas
ti las iscrio in sardu istile
po t’augurare Bona Pasc’e abrile
cun peraulas sintzeras e amigas.

Isetamos sas dies de importu
po nos iscambiare unu saludu,
una ‘etada ‘e manu, un’azudu,
unu sinnu de amor’e de cunfortu

cun disizos de paghe, de armonia
in custu tempus feu, truvuzadu
da nues minetosas, boltuladu
da avolotos de dogni zenia,

da bandelas nieddas che sa morte
ispaltas a sos bentos traitores,
mamas e babbos, mannos e minores
rutos in bratzos de sa malasorte.

Isetamos dies nòdidas de annotu
po torrar’a sos males s’isperantzia
e a sos poberitos sa bundantzia
de un’ucon’e pane mai connotu.

Tue, Zusepe, custos arrajonos
ei custos fastizos los atzeta
e si tenes, che mèigu, sa retzeta
po che ‘oltare sos malos in bonos

e po sanare dogni suferente
naramìla, ca provo deo puru
a dare lughe ue b’at iscuru,
torrare, ue mancat, sa currente.

Cun custos oriolos, de ‘asie,
ti saludo, Zusepe, cun s’ispera
chi ‘enzat tot’in bonu, a manera
chi siet Pasca finas dogni die!

Iscanu, 29-03-2015-Dominiga ‘e Pramas