Rùet a mesu costa et est fundada
in Moristene, su trighinzu antigu:
tra roccas de basaltu in logu aprigu
l'hat de chercos su monte incoronada.

Forte in s'amore e in s'odiu famada,
tenet sacru rispettu pro s'amigu.
A magasinos incunzat su trigu,
casu, lana e carvone a totu dada.

Tenet binzas, pasturas e masones
bellos chi non bi nd'hat in Logudoro,
e tribagliantes chi non sun mandrones.

Cun su chercu immortale b'est s'alloro:
est mama illustre de dignas persones
chi l'han bestida cun sa lughe insoro.