Est abberu chi su tempus coladu
non torrat prus, e gasi depet esser;
ma chie est chi non diat aggradesser
chi nessi parte nd’esseret torradu?

Non so chircande de sos nurachesos
nen de su tempus de sos juigados
indipendentes, bene guvernados,
in su traballu totus intertesos;

cheria solu de torrare a bier
su tempus de sessanta annos a oe
chi faghiat a totus bonu proe
puru dande su prangher e su rier.

Chene esseret polìticu o dotore
jùighe, missennore o avocadu
fiat cuntentu donzi istudiadu
e finas su massaju e su pastore.

Ca mi paret chi tando, s’armonia
de bonu cherrer, grabbu e tratamentu
marcaiant sa vida onzi momentu
cumente in dolu gasi in allegria.

Odde’! A non torrare cuddas festas
e cuddos ballos tundos a trepiza
intrande paris babbu mama e fiza,
e zovanas galanas e onestas!

Non m’est disizu s’istare afestande
ca como festa che nd’at donzi die
sìnchera istima aggradat a mie
parentes e amigos bisitande.

Biso zente torrande su saludu
porrinde azudu e dande corazu
ogande una erbeghe dae su tazu
pro su disocupadu disabudu.

Disizo, pro su restu de sa vida,
chi sa pessone a totus fatat cara
torrande costumantza e moda rara
de cudda limba antiga preferida.