Cun sos ojos serrados
lestru mi peso in bolu
in disizados logos de ispantu,
de lughes semenados
e rios de consolu
ube s’isorben dolos e piantu.

Non b’at lamentu ‘e penas,
ne ùrulos s’intenden
de gherras o de ómines chi brigan.
Ne sonos de cadenas
chi sos melmos ti prenden
e chena aer faddidu ti castigan.

E paso in su mudore
chi su corpus m’inchinghet
e sa mente m’istringhet
in pessos de amore.

Cun su menzus colore
s’ànima mia tinghet.
In ammentos m’ispinghet
de dies de lugore.

Un’istrimuzu intendo
chi sos ojos m’abberit
e mi cumparet torra su presente.
E sas isperas rendo
a issu chi m’offerit
pagu tempus de pasu solamente.

E sa presse mi leat
de poder ponner passos
in calch’àndala ‘e gosu ancora abberta.
Ma su coro s’anneat,
custrintu in custos zassos
ube sa vida est semper prus intzerta.

Catene

Con gli occhi chiusi
mi alzo veloce in volo
in agognati luoghi incantevoli,
disseminati di luci
e fiumi di conforto
dove si sciolgono dolori e pianto.

Non vi son lamenti di sofferenze,
ne urla echeggiano
di guerre o di liti tra uomini.
Né suoni di catene
che ti legano le membra
e senza avere colpa ti castigano.

E riposo nel silenzio
che il corpo mi cinge
e mi stringe la mente
in pensieri d’amore.

Con il più bel colore
tinge la mia anima.
Mi spinge in ricordi
di giorni di luce.

Odo un rumorio
che mi apre gli occhi
e di nuovo il presente mi compare.
E rendo le speranze
ad esso che mi offre
solo poco tempo di pace.

E mi prende la fretta
di poter camminare
in qualche sentiero di gioia ancora aperto.
Ma il cuore si rattrista,
costretto in questi luoghi
dove la vita è sempre più incerta.

29 marzo 2015

2° Premio alla 56^ Edizione del “Premio Ozieri di Letteratura Sarda”, sezione Poesia Sarda inedita “Antoni Sanna” – OZIERI 26 settembre 2015