Battor fioridu

Cal’incantu m’as fattu pro t’amare
e regirare custu coro tantu.
Pro t’amare m’as fattu cal’incantu
e tantu custu coro regirare.

Si penso appena de t’ismenticare
s’amore de pena ricumpenso.
Si de t’irmenticare appena penso,
ricumpenso s’amore de pena.
Si de t’ismenticare pens’appena
de pena ricumpenso s’amore.
Nott’e die mi turmentas de dolore
ca troppu t’istimo e ti adoro!

Cale incantu m’as fattu pro t’amare
e regirare tantu custu coro.

Comente pro Glicera fit Lindoro,
ardente so de cussa manera.
Comente fit Lindoro pro Glicera
de cussa manera so ardente.
Pro Glicera Lindoro fit comente
ardente de cussa manera so.
De cantu t’amo sa proa ti do
in custu fozu de lacrimas infustu!

Cale incantu m’as fattu pro t’amare
e regirare tantu coro custu!

Su viver sentza te mi daet dirgustu,
pro me ses tue unu focu celeste.
Su viver sentza te dirgustu m’este,
unu focu celeste tue ses pro me.
Dirgustu m’est a viver sentza te,
tue pro me ses unu celeste focu.
Ue so, ue abìto, in donzi locu
sa tua visione semper tenzo in coro!

Arzana, su 18 de santuaini de su 1963