(A muzere mea)

Cheria semenare
campos de risu.
De cuddu risu tuo
ch’est in colore ’e oro
e ti luchet in laras.

Sun paràulas craras
bessitas dae coro,
lepieddas che bentu.

Campos de risu,
de cuddu risu tuo
prenu ’e sentimentu,
prenu de alligria.

A canno rides tue
sas battor istajones
cantan poesia.

Granos de risu,
de cuddu risu tuo,
dachi no apo campos
ne abba pro abbare,
assumancu una junta.

In sos predàrjos meos
de làcrimas infustos,
de làcrimas de risu,
de cuddu risu tuo
dia cherrer prantare.

Ma si marro a sa sola,
ti preco, coro meu,
azùdami a messare!

In tempus de agliola
azuda a bentulare!

S’incunzamus impare
azudat finas Deus.

E risu tuo e meu
sichimus a prantare.