Cando mi movo in chelos de poesia
chircande de sas musas
sa majia
chi est risu e piantu e pessamentu
ando in bolos de bentu
non prus a sa terra incadenadu
e su mundu
chi s’ànima at brutadu
dae conca mi fuit d’unu prontu
ne amento s’afrontu
chi a sa carre sas dies an fatu…

Cando colo in andalas de rimas
e intendo milli primas
chi de astrau prenden sas oras
de chie est arrumbadu
chen’istimas
nen bisos
ne ispera:
unu frore pomposu e chene coro
cumparit sa poesia…
nen dat succurru cussa galania
a chie sa libertade l’an furadu
e l’an furadu pane e dinnidade
solu s’umbra lassandeli a cumpanza.

In su mundu ‘e sos versos
chirco disisperadu e no agato
s’ispada chi no apo
e su podere
de frimmare farrancas d’inzustissias
nen mudare malissias
chi mi ferin su coro onnia mementu…
tando una duda manna
mi trattenet sa manu
in boboras de nudda e de dolore
in ue intas s’amore
paret derrutu e bintu
dae sa sorte irfatzida
chi in su liminarzu est in ovretu…

Mentzione de onore setzione poesia in rima cuncursu "Tiu Finu Romana" - 2018