| CANDO
FALAN TITIAS E ILGERROS
Cando falan titias e ilgerros
totu si prighizonat e si morit,
dogni pranta s’annuzat, iscolorit
a sos primos alientos de fritura
e sa debile, umana criatura
issa puru nd’intendet sos inserros.
Cando falan titias
e ilgerros…
Fin’ai como
tèteras e bias,
sas istimadas, fraziles piantas
paren drommidas a intro ‘e mantas
chi tratenen drucuras e calores,
ingalinados paren sos motores
e istudadas totu sas ispias.
Cando falan ilgerros
e titias…
Afastizadu, deo
lis cumando
chi iscanzen sos ogios sonnigosos,
abbramidos chi torren, disizosos
de acoller sa lughe ‘e sos istios
e de los render ancora prus bios,
ispibigliados, lughìdos che tando.
Falan ilgerros
e titias cando…
Como mi parzo
in mesu ‘e ferros,
inghiriadu da sos males totu:
torrat sa mente a tempus remotu
cando afrontai istios e beranos,
cando fun sos sentidos pius sanos
e a tesu dimonios e inferros.
Cando falan titias
e ilgerros…
E nde conto ispantos
e maias
de cussos tempos zovanos minores,
illughidados da chentu colores
chei su ‘irde de sas isperantzias,
cando parian de moda sas bundantzias,
cumpanzas de sas mezus melodias.
Cando falan ilgerros
e titias…
“Como chi
so’ arrivadu - mi dimando -
ite m’addurat de su ch’apo fatu?
Ite m’addurat de custu retratu
chi apo tentu po tota sa vida?
Puite sa carre mia consumida
cheret chi ande. E puite mi ch’ando?”
Falan ilgerros e titias cando…
E no’ tenzo risposta a cust’arcanu.
Ma b’ispero chi torret su ‘eranu!!!
Antoni Piras
|
