CANDO FIMIS MINOREDDAS
Luisa Scarpa Chessa

Sende minores fimis giogareddas,
poveras mamas cantu tribulare,
no ressessian a nos appasigare,
ca fomis pro natura birbanteddas.
No timimis minetta né paura,
simpaticonas fimis, coraggiosas,
fit su ‘eranu de sas primas rosas
ca senza pensamentos d’amalgura.

A bortas pro sas mamas fit consolu,
e motivu de soddisfazione,
si no cherimis intender rejone
issas mutian Maria Lentolu.

Tantas bortas su malu fit su moro,
chi intraiat da-e sa cobertura,
o sos lupos ch’enian fura fura
chi da-e pettu nde ‘ogan su coro.

Tando a mala ‘oza torraimis
a calmare s’istintu coragggiosu,
ma poi torraiat furiosu
s’istintu de s’edade chi godimis.

Nos contaian sas fabulas bellas,
Pinocchio, Cappuccetto e Morgana,
cherimis bene med’a sa Befana
chi ‘attiat ciucullatt’e caramellas.

Cappuccetto pro me fit una pena,
sola cun su lupu in sa foresta,
cheriat fagher a giaja sa festa,
proite no li ponen sa cadéna?

Luisé, ancora ischidada sese?
no t’appentes ma drommi fiza mia,
nara su Credo e s’Ave Maria,
rispettosa sias e cortese.

Conta sos anzoneddos fin’a chentu
gai ti drommis pasid’e serena,
ammenta a Maria Madalena,
a Sant’Antoni e Santu Larentu.

Cara mama umil’e cumprida,
cant’affettu in coro riservadu,
in Campusantu bi l’hap’ammentadu:
no m’hat rispostu, mama fit drommida!