Si non zuches bertera sa cussèntzia
de zudìssiu non bies semu ‘e luche
e non intendes s’àlidu ‘e sa Ruche
sambenande pro tene istillas d'oro
a gùtios de rispetu intro su coro
pro ti render braghera s'esistèntzia.

E tue, chin sos pessos boia-boia
pones fatu a sos bìssios de sos bentos
semenande misèrias e lamentos
in sos disinnos de s’umana casta
... ma no incunzas granu, petzi rasta
d'ispicas sichizones in s’arjola.

Podes chin alas frassas de astore
rucrare sa cussorja ‘e s’infiniu
ma si non zuches chivu in su sentiu
sapiesa non ghelat sa resone:
che in su nidu cando unu puzone
crochit obos chentz’ànima e balore.

Ite contan sos benes de gastare
si s’anima est assuta e istuvada?
E si sa beridade est lacanada
Cal’est su gosu chi nd’as a retzire?
Si a cara franca non podes issire
pro ti poder de òmine bragare!

Podes aer birtude ‘e milli prendas
mannas cantu sas pratas de su chelu
o bramare de esser un’anghelu
chin sos poderes de su Soberann
ma si de Issa non ti parpat manu
non ti ghelan a frutu sas siendas.

Si t’intendes sa mente isarbulia,
che istajone chi non granit bunda,
tando iscapas sos pessos a sa runda
in chirca unu sentore ‘e Dinnidade:
Fiza ‘e su samben, Mama ‘e beridade
de s’esister sa luche ‘e sa nadia.

Cando su chelu annuat a s’ispissa
su sole imbiat luche mesu barja
a sa terra, e in s’aghera corbarja
isparghet alas mìseras su Frore,
chentz’alenu ‘e bida nen colore
s’-in su pessare tuo ... mancat Issa.

Tertzu Premiu in Rima a tema impostu Dignidade: fiza e mama de … setzione Musserradu Meridda - XXXII Premiu Logudoro 2013