Cando cantaias tue
s’allumaiant sas dies
e su silentu si ’estiat
cun peràulas de poete.

A t’intender cantare
a bortas
cantaia pur’eo
comente cantant sos bisos
segretos e chena ’oghe
in camineras de tempus.

E-i como chi prus
no t’intendo cantare
curret surdu su ’entu
in andalas de fozas
collit umbras istraccas
e las ponet lamentosu
in d-unu letu ’e pedra.

Ma est sa poesia
chi sempre mi torrat
de te si prenat
e chena te si afogat
in d’unu mare mannu
de assutore angustiadu.

Proite
dae cando tue no cantas
prus no m’agato
sas paràulas chi chirco
pro su chi mi mancat.
In su tempus chi passat
e in su bòidu chi lassat
sa ’oghe possente
de milli ammutinos.