Candu pasiat sa Musa
de Vincenzo Piu

Sighit s’annada mala ‘e poesia
de sa canzoni mia trascurada,
annu po annu sa rima è bolada
e dogna versu parit consumiu-
che fundu sfruttuau impoberiu
po nd’air isfollau s’armonia.

Sa cobedina no cantat diciosa
e no crocolat cuba canterina-
ca mancat succi po una duina
e s’estru po su muttu spiritosu,
chi poniat ammaliu e gosu
sendi praxili satira briosa.

Istratallau m’anti s’allegria
lassendumì su coru axiau,
de su tempus ostili ’loriau -
prus a nixiunu ndi regalu prexu,
po sai lintu bisus de su strexu
cungendi a su sentidu fantasia.

Ta lastima però… no ddu creia!
immoi ca ndi fia assaborendi
delissia indorada pendipendi
in pertias- de drucciori carriadas,
nd’allogu is ainas ossidadas
ca tott’in d-una acabat sa maìa.

E po effettu finit sa binnenna-
manchendi calidadi in masseria,
sa prama nd’arretiru de sa ‘ia
ca no si gustat prusu in magasinu
sa battorina inciuppada ‘e binu
e de-i custu cantu serru s’enna.

Chissai chi torrit cuba arricchia
de poesia- pinta de ispera-
accucurendi versus de cudd’era
po cuntentai s’anima primada-
de dogna passioni ‘sbuidada
ca de espertus- no fut preferia.

Ammiru sa giuria- competenti
ca in s’ammassu scerat poesia,
troppu modesta resultat sa mia
mancari coloria a bortas parit
no podit essi prima si no balit
ca bincit su poeta prus valenti.

Occannu parit beni incaminada
po binnennai musa de talentu -
nd’acciunju a sa cuba su framentu
de poetica moda arretrogada,
mentris abetu su giustu momentu
po nd’iscuppai cantu de annada;
chissai chi torreus a delissiai
mutettus cun su sonu de cantai.

<><><><><>

SINTESI IN ITALIANO DELL’AUTORE:

Il compositore “ bingiateri” deluso dell’andamento del suo raccolto letterario;
In questi versi vuole fare intendere che la sua modesta poesia è come un ceppo di vite - che viene sfruttato per tanti anni, contribuendo a riempire la botte della cultura, dando un valido supporto al canto in genere.
Tutto questo può far piacere al poeta stesso, ma gli si stringe l’animo, nel vedersi quasi messo da parte… dopo aver già conosciuto il valore del suo frutto spesso decantato e premiato.
Intanto le viene da pensare che tutto ciò che produce, sia vecchio e ripetitivo o comunque passato di moda, da sembrare al quanto fuori luogo; allora decide di chiudere la sua azienda artigiana e arcaica, così anche la creazione e la distribuzione del frutto stesso e di conseguenza il suo canto, posando così gli attrezzi del mestiere- al loro lento e penoso ossidarsi.
Questo per un periodo limitato…
lasciando che il campo si riposi e si rigeneri, finché il suolo ritorni ad essere fertile- per un reimpianto, fino a riottenere un prolifico raccolto; e presentare il frutto di nuovi innesti, fatti con marze di pianta madre- del tradizionale canto, tanto per non dimenticare.

Premio di segnalazione al "Premiu 'e Poesia Sarda Santu Mauru" Sorgono - 2013