Cantas dudas
di Gigi Piu

Vittoriu, prò te mi addoloro
Ischinde chi pianghes a sucutu,
T'agghejant sos turmentos de su lutu
Ca t'est mancada sa lughe 'e su coro.

Sos pensamentos mios imbarratzant
Naro: Deus esistit de abberu?
Cando sos mossos de su disisperu
Su coro e-i s'anima ch'istratzant.

Mi at a perdonare su Signore
Issu chi est immensu, bonu e giustu,
Ma proite sutzedit totu custu
Chi s'allegresa gambat in dolore?

Non movet foza si non cheret Issu....
Gai narat sa nostra relijone,
Ma non so tzertu chi tenzat rejone
Ca tropu disàuras at permissu.

Est litzitu chi lenza carchi duda
E creo pagu in d-una vida noa,
D-ogni die nos ponet a sa proa
E d-est sa fide mia a mori -istuda.

Tue chi pregas pius de a mie
E crees in sa Divina Onnipotentzia,
Non podet esser chi propiu a tie...
At cherfidu proare sa passentzia.

Cheria creere in d-unu Regnu nou
Chi siat totu gioia e recreu,
Pro agatare inie a babbu meu
E tue, cussu raru lizu tou.

Tue chi ses de fide pius forte
Iscuria su respiru 'e su Signore,
Ca ti dal agguantu in su dolore
E-i s'amore Sou 'inchet sa morte.

Si sanat sa piae e-i sa bua,
Si 'etat farche a betzu e a pitzinnu,
Mi costai, ma l'atzeto cun resinnu
Fata siat sa volontade Sua.

Magumadas su 1° de 'Ennarzu 2011