Apo disizos de tempos passados
canno a sas primas nues moricadas d’attonzu
m’ischidavo massaju,aperinne
sos ocros d’incantu a su munnu.

Canno junghia sor boes carrales
a su carru,respiranne cuntentu
s’alinu caente da sor naricros
nuscosos de menta e triozu:

E dzeo profumavo galu
sapore de isposa
dromminne in s’apposentu
cuntenta in sonnios d’amore.

Apo disizos de tempo passados,
canno narvonanne preparavo
sa terra,carinnannela che zobanedda
l’ispizzabo da mattas e rubos:

Poi chin s’arbada l’aperio sa tula
che isposa innida sa burba
e timorosu de la erire,isperanzosu
che tuttavo su semene.

E precabo su santu masedu, cantanne
malinconicos gosos,tott’unu
chin sa boches de sa natura
chi mi ballabat’intunnu benigna.

A denotte in s’arjola ‘e sos chelos
ingranida ‘e isteddos
sa luna prinza,ischeddada
che pane ‘e impinnu
si pesabat’dae su monte
a nor beneichere:

Corcad’ a costazu a su boe masedu
sonnienne incunzas bunnantes
e risos alligros de pitzinnos.

In bidda a sa recuida,in su jannile
m’aspettabat’galana s’isposa,in manu
chin sos ferritos sas’iscarpiteddas
isfertzidas de lana,cantanne ditzosa
muttèttos de amore e d’ispera…….
carinnannesi sor fiancos lugunidos.

4°premio ex aequo sez.S.Bertulu. Premiu logudoro 2021