Povera isola sarda isfortunada
formadi dae coro unu lamentu
apena intresin in cumbatimentu
subitu cumandesin s'avanzada
e issos senza ischire a su mamentu
totu currende a sa disisperada
e issos cun animu e cun azardu
morian pro defender s'istendardu.

Isola isfortunada veramente
da ti potes jamare a boghe manna
custa gherra nde 'ochit e nde dannat
chi sa Sardigna est torrende a niente
e sos soldados cun coro potente
morin ma sa Patria no ingannan
e sos soldados sardos cun valore
defendene sa Patria cun amore.

Sardigna mea pianghe a sucutu
ca su tempus bennidu male t'este.
Pro su disizu de Trento e Trieste
tota s'isola sarda an postu in lutu,
prima fisi malvaza e fis areste,
nessunu pro t'amare resolutu,
ses oe a su bisonzu calculada
e poi 'enis de nou abbandonada.

Isola a ite puntu ses ridota
chi de totu sa gente ses mischina,
como sa gioventura est morta tota,
solas sezis restadas sa feminas
e ben'apat sa gherra, est sa connota,
infatis sa Sardigna est in ruina
solos sono restados sos mazores
paris cun sos pizzinneddos minores.

Isola si pianghes as rejone
da podes dae coro lagrimare
senza motivu e senza chistione
totus nos jughen a nos masellare
povera nostra populazione
chi chena gente 'enimus a restare,
custu chi siat beru non l'ignoro
morimus totu pro gustos insoro.

Veramente su fronte est malu totu
miseru a chie b'este distinadu
però a cantu s'este judicadu
in su Carsu bi faghet pius motu
infatos chi s'est bidu e s'est connotu
chi an s'isula sarda arruinadu
e pro aere fatu tale prosa
restesit sa Sardigna lutuosa

Eviva sa Brigata Sassaresa
eroes da sa Patria Nadia
in 'ogni puntu an fatu balentia
cun animu e coragiu e cun lestresa
e su Barantases Artiglieria
b'aian pro lis fagher sa defesa
e pro lis dare de pius coragiu
s'artiglieria isgombrat su passagiu.

Li fato ischire a sa patria mia
ite fidi su meu regimentu
pro chi issos s'onore nd'apan tentu
lende medaglias de 'ogni genia
est su Barantases Artiglieria
ch'at resistidu a su cumbatimentu
pro aer sa trincera conchistadu
s'artiglieria at su logu divoradu.

Su vintunu 'e austu pro ammentu
bi fit s'assaltu a su trincerone
e cumunzesin su cumbatimentu
de sa fucileria e de cannone
a su Chimbantaduos Regimentu
distruesin su terzu bataglione
sos primos ch'a s'assaltu sun andados
los an cumpletamente massacrados.

S'artiglieria nostra at ripitidu
su Barantases e sa Campale
a comente su logu at destruidu
pariat su dilluviu universale
ei s'inimigu nd'est isparidu
cun d'unu corpu crudele e mortale
ei sos pagos chi sunu restados
los an a baioneta fragellados.

Ancoras su poeta nd'est in gherra
at meritu de ponner sa cantone
dae cando intresi in cussa terra
die e note carrende munizione
isparende 'ogni muntagna 'ogni serra
a puntu de crebare sos cannones
e tirende a tiros precisados
a sas trinceras e sos reticulados.

Patria sarda ti podes lagnare
ponnerbi in su giornale carchi articulu
custu fatu nd'est mannu e nd'est ridiculu
pro chie bivet sind'at a ammentare
ecola s'ora de non s'ismentigare
de nois nd'an formadu unu fassiculu.
Como est chi nos faghen cara 'ona
e poi novamente t'abbandonan.

O Terra cantu sese lastimosa
su 'e t'ider gasie abbandonada,
orfana sena gente ses restada
ja ti potes jamare isfortunosa
gramala una paghe maestosa
chi che torret sa gente ch'est restada
ca custu l'amus bidu e jutu a notu
chi a Sardigna non torramus totu.

Ite sorte crudele nos iscramat
de barbaros dolores, de fastizos,
sos chi semus in mesu a sa fiama
pienos de pensamentos, de disizos,
a chie lassat muzere e frade e fizos
a chie lassat babbu e sorre e mama
e zertos chi lassadu ana s'isposa
ite morte crudele e lastimosa.

Babbos e mamas chi fizos tenides
in sa gherra, chi sun cumbatende,
die e note los sezis isetende
e mai cussa die non bidides
e chi siana mortos non creides
semper bos paren chi sian 'enzende
e a ultimamente de pensare
bider atere e issos non torrare.

Letores chi legides sa cantone
non bi ponzedas tantu cuidadu
posta dae unu semprice sordadu
cun paga musa e paga istruzione
però su chi bos canto est sa rejone,
custu est fatu bistu e capitadu
e non bos canto cantigos modernos
ca sun fatos pratigos e paternos.

Sebastiano Pilosu (Torpè)