1
Sos chi tenene in domo dis'amore
Cussos si deven riconciliare
Si s'intendede unu, unu dolore
Assistire si devene tra pare
Si semplice capita calchi errore
Unu a s'ateru deve tollerare
E tenne sempre s'istimazzione
Po chi vivana in paghe e unione

2
Non ponzedas savida in terrorizzu
Mandade su disforziu in fiamma
Sa Mamma non connosche prus su fizzu
Su fizzu non connosche prus sa mamma
Diventa tottu tormentu e fastizzu
Sen’istimazzione e sena bramma
Istade cun su santu matrimoniu
Sena ponnere in mesu su dimoniu

3
Cando Deusu Adamu ad’impastadu
Anima e coro la postu in s'intragna
Ca fi solu e sempre airadu
E fatu la de issu sa cumpagna
Ca s'omine a sa derra este mandadu
Non che un’animale a sa montagna
Ma po vivere in paghe e accumoniu
Ligados cun su santu matrimoniu

4
Lassade cussa legge e su disforziu
E leade sa legge Cristiana
Sinò che animales de negoziu
Chi los bendiana e los cambiana
Urtimamente diventana a sozziu
Dadoso tottu a sa vida mondana
Leade Cristiana custa legge
Chi cura su difettu e lu curregge.

5
Cussa no este legge de osservare
Chi non la cheren sas bonas pessones
Chi sa zente de bonas’ arresones
A su fogu che l'etana a brusare
Cussa est legge de aumentare
In sas famiglias sas disuniones
Chi si est posta cussa legge in usu
Paghe in su mundu non che ndada prusu

6
Si este osservada cussa legge
Diventada una vida vizziosa
Mancu deus prusu los protegge
Chi lassada a mancare ognia cosa
Est che sena pastores unu gregge
Dados tottu a sa vida vanitosa
Ant'esse tottus amestur'apare
Che sas bestias malas a domare

7
Cussa legge non giughe veru amore
Solu s'avilimentu e i s'ingannu
Dae sa domo sa distruggitore
De tottu sa familia su dannu
Non sentini birgonza e disonore
Cambian tres pobiddasa in dun'annu
Bessinde unu a destra e unu a manca
Brivos de bivere a cara bianca

8
Sigussa legge essere resurtada
Ad'essere unu bellu mazzimurru
Cussa zente ana essere portada
A fischios e sonos de tamburru
In sas carrelas e in indogni istrada
Commente sas’iscovulas de furru
Dende su mal'esempiu in su dottu
Chi mai si est bidu e ne connottu

9
Bos averto caros cristianos
Attentamente de bei penzare
Ei sos fizzos commente an’andare
An'esse peus de fizzos unfranos
Chi nessunu los ada abbaidare
Ca suni fizzos de sos inumanos
Peus de sa Tigre ana su goro
A non connosche sos fizzos insoro

10
E una mamma bona affettuosa
Arriscana sa vida po sos fizzoso
Piena e penzamentoso e fastizzoso
Lis este in dogni passu premurosa
E de nde faghe puru orgogliosa
Unu giardinu de rosas e lizzoso
Non solo po nde denne su valore
Ma ancora po fama e po sonore

11
Ordinesi s’infame Faraone
Sos fizzos mascos de los affogare
Una mamma cun grande affrizzione
A penzadu su fizzu e si cuare
Ca li teniada istimazzione
Po li bode sa vida liberare
Cussa es mamma cara e nodida
A su fizzu salvareli sa vida

12
Lassade cussa legge Basilina
E leade sa legge Santa e vera
Es legge po sa zente libertina
Chi non si tenene istima sinzera
Cussa es de sa vida sa ruina
Chi nd'ana a pranghe de ogni manera
Si gussa legge cumanda guai
Paghe in sa zente non chendada mai

13
Prima de ponne zente in tribulia
Cumbeni cussa legge chi si seghe
Deo ndapo leadu una ebbia
E creo chi s’affettu non mi neghe
Mancari unu mi nde diada deghe
Ca este una leada po sa vida
Fina a esse sa morte interveniva

14
Cussa legge la usa Deu solu
Ches su supremu e sa Celeste Corte
Deus los separa cun sa morte
E sos chi lassa li giuchen su dolu
Cun’amaru piantu e discunsolu
Cun grande sentimentu e pena forte
Cussu es su disforziu legale
In sa vida po dognia mortale