1
Lenardu chin sa franza ses naschidu
Induna domo de nobilidade
Ma po aere a Deusu servidu
T'as leadu sa vida e Santidade
A unu monte ti che ses partidu
Abbandonende sa felicidade
Po faghere in su Monte penitenza
E a Deus po dare ubbidienzia

2
Cando sa penitenza as finidu
A gussa franza non bi ses torradu
Ti asa ateru logu istabilidu
Chin sa campagna ti che ses firmadu
Fi logu dae Deus promitidu
E chi tue ti lasa meritadu
Po esse visitadu de tottue
Po sos favores casa fatu tue

3
Ses in d’una Campagna tantu amena
Chi de Santu Lussurgiu ses vicinu
Terra de ogni grazia piena
Chi si cuntenta dogni pelligrinu
Aera frisca calmante e serena
Chi sullevada dognia mischinu
Vivede allegra dognia pianta
Paren chi siana in sa Terra Santa

4
Sa Cresia chi tana fabbricadu
Es fatta tottu a perfezione
Cun su materiale cumbinadu
Tottu gantu a pezzos de Contone
Ma pare chi nde l'epana leadu
De su Tempiu grande e Salamone
Bell’e gostruzzione e de figura
Cun sos ricamo de architettura

5
E bi este una Nughe secolare
Cun sos Elighes Urmos e Costanzas
Creschidas sunis a proas de bare
Chi paren d'esse tottusu cumpanzas
Commente las intenden pubricare
Che nd'eni finas de terras istranza
Chendeni po cuntentu e passiones
Finasa de lontanas naziones

6
Poi bi suni sas sette fontanas
Tottugantas de abba cristallina
Po medasa chi suni pagu sanas
Lis servidi de gura e de meighina
Abbas chi benin de terras lontanas
E passana in sa via Montanina
Po gussu est chi es pura e chi es bona
Menu de Ipocrene e d’Elicona

7
Da boi tottugantu est alberadu
Friscasa chi non parene in sistiu
Su logu tottugantu est ordinadu
Bene trattadu e bene puliu
Issu pare chi sia seberadu
Po nde dorrare su mortu a biu
Su lu bie de dottusu este acisu
Paret s'Eden terreste Paradisu

8
Benin dae lontanu sos Turistos
E istana s'istade tottu intera
Albergos Ristorantes sun provvistos
Comodidades de ogni manera
Po visitare su zeraccu e Cristos
Sos chi li denene istima sinzera
Bell’est su logu e belles su santu
Su lu bie de dottusu est’incantu

9
Da boi bana fattu sos palazzos
Modernos tottus a proas de bare
Cun belloso barconese e terrazzos
Chi a tottusu faghene incantare
In sos barcones appozan sos brazzos
Cherinde tottu gantu cuntemprare
E gussoso bellissimos palattos
Po onore de Lenardu suni fattos

10
Inie faghen festa nunziale
Assumancu una orta dogni chida
Inie firman su Cogniugale
Assegurados pro dottu sa vida
Permesu de su Re Celestiale
Chi Lenardu lis dia sa guida
Dendelis santa benedizione
Vivere sanos in paghe e unione

11
A da chi fiasa in su Monasteru
Faghiasa una vida e santidade
Amaias su mundu tottu interu
E assistias cun sa caridade
Ca fisi bonu e de goro sinzeru
Amante e dogni sorre e dogni frade
Visitas sos malaidos corcados
E finas sos chi fini carcerados

12
Sa die sese de Sant’Andria
Est sa festa tua dedicada
Est una festa de grande armonia
Missa solenne e preiga sagrada
Cun sa offerta de sa Eucarestia
Po sa zente devota e battizzada
E su populu tottu in unione
Giughene a tie a prucessione

13
Lenardu apo una cosa e ti pregare
Si tue ses cuntentu e m'obbidire
Sos malaidoso potasa curare
Sos poveros potas assistire
A sos chi benini po ti visitare
De guida lis potasa servire
E fetasa evidente su miraculu
Chi che dorre su toppu sena baculu

14
Per mesu de sa tua opera bona
Deusu fattu nde ada unu Santu
Tue t'as meritadu sa Corona
De Santitade chi sunfridu as tantu
A sos chi dana offesu los perdona
A nessunu non lassese in piantu
E a Santu Lussurzu sos produtos
Lis dias cun su bene sos frutos.

(Boroneddu)
Scritto nel 1977