Cantu podet sa paraula
di Antonio Longu

Pro chi non siet sa ‘oghe potente,
cando iscanzat de laras un’ omìne,
no che nde l’essit da ‘ucca ‘e macchine
ca su ‘e narrer pesat prima in mente.

E si l’ispendet tando una peràula.
Pro tota vida in coro la mantenet,
ca s’est omìne chi a s’onore tenet.
sa pena affrontat ma non narat fàula.

A daghi unu s’agatat indetzisu,
e no ischit sa via ‘e si leare,
sa peraula giusta podet dare,
a ‘cussu tale, s’indicu pretzisu.

Capitat puru de s’innamorare
a prima vista ‘e sa candida dea,
poi de bottu ‘e cambiare ‘idea,
appenas chi l’intendet faeddare.

Non la podet discuter su sordadu,
prite a s’ordine devet ubbidire,
bi lu faghen da su cominzu ischire
chi su ch’isgarrat benit cundennadu.

Cand’ in Corte si devet giudicare,
de peraulas giustas b’hat bisonzu,
ma prima zurat donzi testimonzu
chi solu ‘e veridade hat a trattare.

E cando totu bene los relàtana,
sos zuighes sa causa risòlvene,
s’est innossente sa persona assòlvene,
s’invec’ est rea sa pena l’adàtana.

Cando a su malu su ‘frimmu” l’intìmat,
su carbineri in sa rocca appostadu,
o in s’istrada a s’indisciplinadu,
a mala gana dognunu si frìmat.

Sa peraula ‘e Cristos est bastada
pro cunvertire unu muntone ‘e zente
e sa ‘e Maometto in oriente
hat dadu sa matessi resurtada.

Segnalazione al Premio Logudoro 2007