Cara Giuditta sa oghe amorosa
melodiosa che una campana
mi paret in s'orijia intendo ancora.
Mi naras ch'istas bene, e chi ses sana
solu lamentas nostalgica pena
ca da Sikigo tou ses lontana.
E deo puru che abba serena
cantas lagrimas verso de dolore
isconsoladu in custa terra anzena.
Ca no cancellat mai cudd'amore
c'hapo connotu in sa prima lugura
tra montese, nuraghes'e folklore.
S'Olanda, est'unimensa pianura
sitta sutta livellu de mare
unica meraviglia de sa natura,
parimus sempre in echisse solare
ca su sole lu idimus a ratas
forsis timet de nos iscottare.
Però c'amusu legges bene fattas
ordine, disciplina e fratellanza,
e a tempus sou chermesse in piattas.
Sa zente, cun amor'e, costanza
trabagliada, e produit pro esportsre
dogni bene de Deus in abundanza.
E ispecialistas c'ada pro curare
malese, de ogn'ispezia e zenia
e d'este casu raru a s'isbagliare.
Però no curan cudda maladia
crinica, in su coro 'e s'emigradu,
sa ch'in sardu si narat nostalgia.
Chimbantun'annu e pius c'at passadu
e d'este ben'e giustu chi láttroghe
c'ancora no mi so ambientadu.
Ca mi pret d'intendere una oghe
chi narat, torr'a, domo fizu amadu,
sas raighinas tuas sunu inoghe.
E chissà a da chi nd'hapo iscutinadu
su fiore, e sicca est sa pianta
chi mi che torren bene inpacchettadu.
Pro como cun s'aggiudu 'e calche Santa,
chi deo prego cun devozione,
sa vida mi la godo tataganta.
E si mi cres hapo s'intenzione,
a chent'annos andare a retirare
cun saludu, sa mia penzione.
E tue puru chi potas lograre,
cant'in sa vida bramas e disizzas
e salude chi epas pro nde dare.
In custu mundu 'e milli meravizzas,
cantu idet sa luna in nottes giaras,
godas, cun maridu, nebode e fizzas.
Però, ispara a salve, cando isparas,
ca mancu a Deus piaghes, si frastimas,
ses pius bella cun su risu in laras.
Medita subra 'e sas umiles rimas
chi t'imbio da s'intimu 'e su coro
ca sunu fruas de sas fertiles chimas
eredidadas dae Nonnu Soro.

Mimmia Soro (Olanda)