A deghessett’annos
a tziorcos e fadas creio ‘alu
e sonniao su sonniu d’esistere
tra iscusorzos de oro e de coro.
A degheotto
s’anghelu de sa vida
chin ispada ‘e puntillu e de bisonzu
jagarau m’at dae s’Eden
mandandemi
in donnia coladorzu de su mundu
s’anima mia a chircare.

Cantas carreras!...
Cantas nd’apo rugau
in custu ‘iazu mannu
sutta rajos de fogu
e astrau punghigosu:
ruende e arrizande
chene paghe
chene pasu
chen’agattare
s’andala de su coro.

A settant’annos galu
so avantande a pesa-rue
in sa carrera istrinta
chen’iscusorzos d’oro
chen’alinu
chene lughe
troppu istragu d’essere
de ‘idere
d’intendere…

Pessos in caminu perdidos
s’istana sas nottes graminande
e sas dies si fuin
chin calavrinas murras
in andalas chi ‘etzos no isettan
lassandemi in buzacca
tres sisinos d’amentos
e mudines
ue tziorcos e fadas
s’ammaju issoro sighin…

Menzione d’onore Concorso di Poesia "Quartucciu" - Quartucciu 2014