Gronitare frenedigu de chervos
e, fattu, a boghes postas in su littu,
trumas mannas de canes e de servos

sìghint su fiottu fuidittu,
lestros, arreiolados e protervos,
pro sulare in su fogu de s’appittu

a donnos e reìnas d’Arborea
e istranzos de Ispagna a buiachesos,
de sa catza reale sa pelea,

subra caddos de pratta ‘ia atzesos,
ch’apprettan sa timoria che frea
a i cussos fiados indifesos.

In su telarzu tou, custa fola
apo leggidu, sende minoreddu,
cando tue, currendebi s’ispola,

tramaìas su nidu e su nieddu.
E comente unu cantu a boghe sola
miraìa, lughente, unu faeddu

de signos trobeìremi su seru,
a manu chi sas mustras fioradas
contaìan, cun nàrrere sintzeru

e lìntzitas immagines fadadas
tramintas a goròvulos, lizeru,
unu bisu d’edades barigadas.

Movias, cun sos pes in sas peanas,
sos littos pro tramìnter’ cussas tramas
chi, si a prima podìa crer’arcanas,

luego mustraìan, noantamas,
chena impitt’e peraulas, galanas
friguras, allumadas che fiamas.

Ma oe in sa Babele ‘e signos vanos,
medende a cuss’alada galanìa
limbazos noos, ma pius metzanos,

mi sero chi sa tua poesia,
nos ivelat, che prenda fatta a manos,
s’identidade ‘e sa nostra zenìa.

Segundu Premiu Ex Aequo Setzione in Rima Cuncursu de poesia sarda “Antoni Piludu” de Iscanu – Annu 2012