A mama (e a totu sas mamas)

In custa note funda
Non bi moghet sisia
Ne istripitu ' e cantos codiaos.
Sa mente mea in runda
Bolat arta, sidía
De lucores de chelos isteddaos,
Chircande 'e tene sinnos
Fozios de amore e de carinnos.
Che alenu 'e bentu
In pupias serente
Mi colas ma disizu non m'apentas.
Nen pache ne alenu
Apo prus in sa mente
Ca in su pessu meu non t'assentas:
Ses inoche e in cue
Ma pro me non t'arressas in neddue.
Sos manzanos rasande
Intro su coro fritos
M'arbeschen sudorande ghiddighia.
M'ischido disizande
Sos ocros tuos fitos,
Chi petzi in bisione mi bidia
Cando tue benias
Chin sas laras de sole e mi ridias...
Paso su pessamentu
In nues de bambache
Ninniàndel'in bàntzicos de luna
Chin sàgadas d'ammentu
E suspiros de pache.
Irgranande sas oras, una a una,
De s'ànima in sa janna
T'iseto che lentore sa sicanna...

(Dae Predas Arbas)