Che elighes antigos
creschidos a pes de monte
chin raighinas fungudas,
in sa vida
no han timidu
bentos, frittu e nie.
Sa gherra,
su tempus malu
de sa prejonia,
suores’e fadigas,
unu camin’istrintu,
tott’a punt’issusu.
Chin amor’e armunia
han pesadu sa familia,
su pagu
bene tramesadu,
pro sa zente
sempes su rispettu.
Tenen chent’annos
e prusu,
custos fizzos
de s’Ozzastra,
donzi die
torran grassis a Deus.
M’incantan
cando los ascurto,
in donzi paraul’issoro
b’agatto lugh’e bellesa,
una ricchesa manna,
s’anima de custa terra!!

Poesia prima classificata al Premio di poesia sarda “Istillas de lentore” di Ulassai (Ottava Edizione – Anno 2014)