Che tando
di Giovanni Fiori

Cuartinas de noenàrios

Serente su linu in fiore
t’ammento. T’ammento che tando...
E torra m’imbèrrias cando
sun tottu sas linnas1 in more…2

Addaghi ogni cosa est cagliada
ne trémulat mancu alchimissa
mi torras sa primma prommissa
cun ojos de ua seberada.

Ca ses biadia e pidinu,
ses frùtture appenas boddidu
e ses inganadu cumbidu
chi ‘enit a… traittorinu.3

E como chi lìmpiu ando
mirende su ‘adu selenu,
sintzera4 che ou pienu
t’ammento...T’ammento che tando.

_______________________________________
1 linnas - le fronde degli alberi, in senso generale.
2 more - qui, umore, linfa delle piante in germoglio.
3 a traittorinu - qui, inaspettatamente, d’improvviso.
4 sintzera - qui, non solo nel senso di sincera, leale, ma anche integra, genuina, ecc.