Non s’indendet sa zarra ‘e su manzanu
in bighinadu de donnia die
non pizzinnos a giogu rie-rie
chi àndana a iscola ‘e bon’umore
ne cuddàndeli e beni ‘e su pastore
semper cuidadosu e chittulanu.

Muda che-i s’a rocca sa carrera
non bolos e ne tziulu ‘e puzone
e so ischidu, no est visione
iscuperinde so’ su chelu in terra.
Pedinde paghe a custu mundu in gherra
muscas biancas volana in s’aera.

Falande e non falande a foza lada
che mariposas lepias in bolu
supra tanchittas chi lis dat cossolu
a su campu drommiu e semenadu.
Cal’incantu prus bellu ‘e su criadu
de su nie chi ponet temporada.

De coro sun atzetas sas fadigas
e su massaiu li tenede amore
che guttios sacrados su sudore
li sulcana sa cara a riu in chizos
tando frorini in sinu sos disizos
de manadas doradas de ispigas.

Est issa chi su sèmene l’ischidat
chi det dare gustosu pane ‘e fresa
nendeli: est ora, aijò, ischida e pesa
cresche benignu amadura sos granos
c’aspetat su massaju a farche in manos
sos durches fruttos ch’in coro l’annidat.

Intras in sas intragnas prus profundas
allatande sa terra e dande vida
lassandela che opera cumprida
prima ch’arricas de mare sas undas.

Segnalazione di merito al Premio "QUARTUCCIU" 2014