Chena sapè siddh'èri illa me sòlti
strinti finz'a mancàcci lu faèddhu,
arrumbati inn'un gùciu di la còlti
pal capitàli pàddha d'un mannèddhu.
Ciuaneddhu m'ammèntu ch'èra fòlti
piddhenditi a mussìtti lu baèddhu,
un tricineddhu d'òssi s'intindìa
siddh'èra fènu o còsti no sapìa.

Cun alligrìa ti 'ùlia bè
e no vinìa màncu la spirànza,
l'amori siminatu vidarè
ci poltarà li frùtti in abbundànza.
Siddhu tu tinni stài insembi a mè
emu lu tantu ghjùstu e cinn'avànza,
inn'una stanza v'è lu di magnà
cillu paltìmu è còlciu ca no n'à.

No passarà lu tèmpu di l'amòri
pruisti n'èmu in tùtti li stasgjoni,
sò pieni li cumpàlti di lu còri
cilca di cumprindì la me passiòni.
Addoca pa la 'ìta lu calòri
com'un focu di chèa di calbòni,
si socu zinicòni, sè puntèddhu
punendimi illu dìtu chist'anèddhu.

Insembi è bèddhu ristà
par'un tempu chèna fìni,
inn'un mundu chi no sà
ne ridì e ne pignìni.

No à cunfìni l'anìma illa mòlti
ma no smintica l'ultimu basgjèddhu
chena sapè sidd'èri illa me sòlti
strinti finz'a mancàcci lu faèddhu.

2° posto alla 3^ edizione Concorso "Paolo Zarzelli" Ajaccio-Corsica 2014