Chentu messazos
di Tonino Fancello

S’intendo musas chi fachene donu
ricamo‘e oro chimeras d’incantu
s’arrumbo mudu chin su coro infrantu
biazo chin lampos e tempero sonu
faco tempesta chin s’arridu tronu.
collo in sa terra farruttas’a mantu,

S’ido broccande frinas in’aeras
ricamo grobes chi frorin per’una
si arrumbo tortu chin sa mala luna
isorvo nudos de sas camineras
vardo sos versos postos in isperas
de cada poeta chi chircat fortuna

Si sos iscrittos bocana sa framma
jungo sa notte messande sos bisos
chirco su tempus de sos annos lisos
chi son bolados a tesse sa tramma
chirco su tempus anticu de mamma
in sos ammentos chi paren aricos.

Chirco sapores tra mortos e bios
de mannos poetas chi trazan valores
chirco su grabu sos bonos umores
chi sone mudos a sos ocros mios
sone in su pruere ma son galu ios
impastan galu mundanos sudores.

S’ido sa luche chi paret d’incantu
faco s’inchinu chirco sos abios
mi fachen festa custos ojos mios
pinto manzanos chi frorin’a mantu
iscurto tottu puzones in cantu
e de sos montes sas feras e rios.

Chirco sa notte s’umanu coratzu
cando s’iscuru prendet su caminu
e chin s’anticu prendo cust’ostinu
chentu chimeras frorin su messatzu
fago su locu chirco su passatzu
preco a sa musa versos de continu.

los preco bellos chi parene fronte
cherzo gherrare in mesu s’infinidu
cherzo cumprende “ue soe naschidu
oje in sa terra …e....eris in su monte.

1 premio a Mogorella -11-08-2011