CHERCU
Di Lorenzo Brandinu

Cuvat mudu secretos e arcanos
su chercu in su padente coloridu
sas raighinas in terra at atechidu
in temporadas de cumbatimentu
cand’afrontavat nie abera e bentu
in s’isfida costante‘e sos umanos

at bintu su passadu e su presente
ma s’arrendet ca ischit su destinu
narat chi dogni cosa in su caminu
naschit e morit sun totu uguales
sian arbules pessones, animales
chi a s’improvisu,torran a niente

linnas e ossos vortan in chisina
ca su ciclu perenne est uguale
e torrat sa materia universale
impastada in arga e muntonarju
b’at unu tessidore in su telarju
ch’intessit bida nova e raighina

chi dogni die rinnovat s’isfida
arcana forza chi movet sa terra
mulinat in sa badde e in sa serra
secat fundet ispaghinat lontanu
magicu s’universu durche manu
chi riconvertit totu a nova vida

molet e isperdet senza piedade
da s’iscoria rinaschit bida nova
in sa natura non finit sa prova
morin e naschin feos e bellesa
rajos de sole forjan in s’intesa
sortes e bidas pro s’eternidade

Terzo premio al concorso di Olbia 2019