Onzi abréschida noa
est una die ‘e vida
ch’a sa terra s’accherat a sa muda.
In chelu faghet proa,
de lughes colorida,
po tìnghere s’aera frisca e nuda.
E naschet donzi duda
in s’ómine chi mirat
pensosu s’oriente,
forrogande in sa mente
s’arcanu po cumprender, e suspirat
dananti a s’ermosura
ch’in ojos li dipinghet sa natura.

E su sole s’offerit
a su mundu sonnidu,
ischidàndende gosos e dolore
in s’ànimu ch’abberit
sa gianna ‘e su sentidu
a gherra e paghe, a ódiu e amore.
E chircas su sabore
chi t’indurcat s’essèntzia
trobojada ‘e sa vida,
de lughes abbramida,
po chi non siat vana s’esistèntzia
a pês de custu chelu
e poder dissipare onzi reselu.

E sas oras che colan
fin’a cando aumbrada
torrat a sero istracca custa terra.
E sos isettos bolan
de sa die colada
cun su sole cuàndesi in sa serra.
Ma non sensat sa gherra
de s’umana cussèntzia,
cun in coro pinniccos,
peleas e afficcos
po unu mundu prenu ‘e sufferèntzia,
ube andamos chircande
su chi da ora semus disizande.

Trascorrono le ore

Ogni nuova alba
è un giorno di vita
che si affaccia in silenzio alla terra.
Nel cielo si prodiga,
colorata di luci,
per tingere l’aria fresca e nuda.
E ogni dubbio nasce
nell’uomo che guarda
assorto l’oriente,
frugando nella mente
per capire l’arcano, e sospira
davanti alla bellezza
che negli occhi la natura gli dipinge.

E il sole si offre
al mondo assonnato,
svegliando gioie e dolori
nell’animo che apre
la porta dei sentimenti
a guerra e pace, a odio e amore.
E cerchi il sapore
che ti addolcisca l’essenza
intricata della vita,
bramosa di luci,
affinché non sia vana l’esistenza
sotto questo cielo
e si possa dissolvere ogni timore.

E le ore trascorrono
fino a quando ombrosa
ritorna la sera questa terra stanca.
E volano le speranze
del giorno trascorso
con il sole che si nasconde tra le montagne.
Ma non cessa la guerra
della coscienza umana,
con nel cuore assilli,
fatiche e speranze
per un mondo pieno di sofferenza,
dove andiamo cercando
quel che da tempo desideriamo.

3°Premio al Premio di Poesia “Filippo Addis” – LURAS 24 gennaio 2015