Dia cherrer chi finat sa timoria
chi custu tempus grae nd’at batidu,
puite at sos sentidos ingrimidu
e a trampa s’est lende sa memoria,
e pius frita e sola est sa zentoria
ch’oramai su coro at assuddidu.

Dia cherrere e antzis los pretendo
cuddos manzanos mios chentza neu,
bios, de bona muta e chen’asseu
e chi cantareddende sempre intendo,
ma sas dudas chi tenzo e no isprendo
sun arrividas cun malu curreu.

Ca non bido s’aera neta mia
chi su cras promitiat chentza pena,
e sas abbas, sas abbas de sa ‘ena
fin s’ispiju ‘e friscura e bellesia,
Totu perdidu? Nachi est bramosia
sa peus, ch’est de s’animu gangrena.

Truvo e curro e currinde so truvadu
in custa pantomima de richesa,
ue si mustrat tota s’orridesa
chi s’umana zenia at acamadu,
sa chi s’omine, tzegu, isfidiadu
at parturidu e poi l’at difesa.

Deo chi mudu resto ca m’arrendo
cun sa mente arestada e intontida,
a chie lasso logu in custa vida
ite naro, comente mi difendo,
cando su cras issoro totu ispendo
e cun s’anima frita, isamorida?

Cheret ch’ischide custos sensos mios
e difenda su mezus ch’est restadu,
chi bene tentu, amadu e rispetadu
diat prendas e frutos regadios,
brivos de sos indignos terachios
chi oe permito e apo bajuladu.

18 de santuaine 2015

ingrimidu = indurito; assuddidu=preoccupato; asseu=ozio;
curreu=corriere, messaggero; cantareddende=canticchiando; Bellesia=bellezza
acamadu=soggiogato; isamorida=apatica, insensibile; terachios=servitù; bajuladu=tollerato

Segundu Prémiu - Prémiu de Poesia Sarda "REMUNDU PIRAS - Villanova Monteleone 30 gennaio 2016