Como chi so’ torradu
a custa terra istraca
intendo prus afaca
sos atitos
de miseros, aflitos,
sos males po cumpanzos,
ne domo, ne balanzos
po campare.
Fugliados da su mare,
a trumas e a frazas,
poninde sas sonazas
in arriscu.
E bio a Frantziscu
a poddighe altziadu
chi narat airadu:
“Non diedas
ne soddos ne monedas
po pigar’a sa chima,
ca est gratis s’istima
de Gesusu”.
Da sos cabos de susu
finas a sas marinas
imperan sas fainas
ladrintzonas.
Preigan da sas tronas,
da palcos e palchitos,
che porcos mannalitos
ingrassados.
E bio sos soldados
a fagher sas difesas
da timorias, ofesas
e minetos….
Ca sezis in isetos
chi ponza mediu, creo,
chi feta totu deo
non pensedas!
Ma ùmiles siedas
che s’ainu e su boe
chi mi cheghentan oe
da su fritu.
No’ ponen pretzipitu!
No’ faghen avolotu!
“Esempios” po totu
su criadu!

Como chi so’ torradu…

Cun tantos augurios!

Iscanu, Nadale 2015